ليت الشباب يعود

ليت الشباب يعود يوماً 
مغامرات الزوج

الزوج لما يسمع اغنية قديمة حبتين 
عيونه تلمع وشبح ابتسامة يترسم على شفايفه ويرجع راسه لورا كانه بيشوف فيلم ابيض واسود وبروقان يقول
يااااااااااااااه

الاغنية دى بتفكرنى باحلى سنين حياتى
الزوجة وقرون الاستشعار تشتغل بتركيز
بجد ؛ طيب بتفكرك بايه
الزوج بتنهيدة حارقة وهو بيبص فى وشها ووش ولادها ولسان حاله بيقول ( انا اللى جبته لنفسي ؛ كان مالها اللى فى بالى كان زمانى متهني )
الزوجة قطعت حبل افكاره : سرحت فى ايه ؟
الزوج : اصل الاغنية دى ليها معزة جامدة عندى بتفكرنى باول حب فى حياتى
الزوجة : اااه حب مراهقة يعنى
الزوج هيمان : مراهقة ... مراهقة دى تبقا ... ولا بلاش
وماله حب المراهقة ده اصدق حب
الزوجة بخبث : طيب لو ظهرت تانى ادامك هتعمل ايه؟
الزوج بجدية كانه كان فى حلم وحد دلق عليه جردل ميه : هى مين ؟
الزوجه : حبيبة المراهقة
الزوج : يا شيخة بلا حب وكلام فارغ
الزوجة : ايه ده يعنى افهم من كده انك مش بتحبنى ؟
الزوج : والله انتى رايقة وفاضية انا ورايا شغل سلام
وهو نازل السلم يدندن اغنية المراهقة
الزوجة بقا بتدعي وتقول : الهى وانت نازل تتكعبل فى شوية اغانى توقعك من على السلم علشان تبطل الهيمان اللى انت فية
الزوج سمعها ورجع كانه نسي حاجه
تقرير الاسعاف بيقول كسور متفرقة فى جميع انحاء الجسم نتيجة القاءها من فوق السلم 
#دماء_فى_الغربة
#بقلمي_أمل_زيادة