السبت، 21 سبتمبر 2013

يوميات شمس







مغامرات شمس في المصيف
شمس الاجتماعي

****

قبل العام الدارسي الجديد كل سنه وانتو طيبين

شمس راح الاسماعيلية ولانه شمس الدين 
فكان لازم اقولكم اخر افتكاسات شموسة

طبعا من اول يوم وشمس مش بيتهد ماشاء الله الصبح فى البحر وبليل فى حمام السباحة ويطلع من حمام السباحة يغير وياكل ويركب عجل ( دراجة ) ربنا يدية الصحة
في اليوم التانى صحى بدرى اووى الساعه 7 الصبح لقيته بيلبس ويقولى انا نازل استكشف المكان
قولت له ماشي
قالى طيب افرضي تهت ؟
قولت له شايف حمام السباحة !!
قال لى اه
قولت له علم البيت بالعربية الحمراء دى 
طبعا هو عرف انى بهزر معاه قالى ماما انتى عايزانى اتوة طيب خلاص انا هتصرف واخد الموبايل وبعد حوالى نص ساعه لقيته بينادى عليا من تحت البلكونه ويقولى انا عرفت ارجع لوحدى واد جن فعلاً
انا قعدت يومين على ما عرفت المدخل نفسه فين  لان العمارات شكل بعض
المهم بليل قعدنا على حمام السباحة نستجم شوية
لقيت كل ما حد يعدى ن ادامنا يقوله ازيك يا شمس
وهو يرد عليهم واحد واحد عساكر ورواد واطفال !!!
نور بيقولى على ما تخلص العشر ايام هيكون اتعرف على النادى كله واد اجتماعي فعلا 
يروح يجيب بيبسى يصاحب العسكري
يروح ينزل حمام السباحة يصاحب اللى هناك
طالع على السلم يتكلم مع ده
بجد مشكلة بقينا مشهورين بسببه 
بفكر اعينة مسؤل للدعاية لروايتى دماء فى الغربة مادام طلع واصل كده 
فى يوم كان فى البحر وكنا كلنا فيه عدت طيارة هليكوبتر وهو شىء نادر فى الاسماعيلية الحقيقة بس نظرا للاوضاع الحالية بقا كل ساعتين او اكتر تلاقى طيارة مقاتله مارة باتجاه سيناء وطبعا بتعدى من فوق بحيرة التمساح شموسة بقا لما الطيارة تعدى يرفع ايده بعلامة النصر ليها ويقول بصوت عالى ( عااااااااااااااااش يا سيسى ) يقوم كل اللى فى المية يرفعوا ايدهم زيه بعلامات النصر وناقص يغنوا تسلم الايادي !!
هو بقا لما يلاقيهم عملوا كده يروح عامل علامة رابعة 
انا ونور نضحك بعد شوية الاقية عمل بأيد علامة رابعه وبالتانية علامة النصر فبقول له ايه ده بقا ؟؟
بتلقائية شديدة قالى منافق 
بعد كام يوم وبعد ماتش الاهلي والزمالك نور قالى على فكرة شمس اول ماتنبأ بالنتيجة لما عمل كده طلع منجم ( بضم الميم ) كمان 
مش بقولكم هحتاجه فى الدعايو للرواية الجديدة
#دماء_في_الغربة
#بقلمي_أمل_زيادة

هناك تعليق واحد: