عزيزى
القارىء يسعدنى انى انقل لكم هذه المباراة
مع الاخذ فى الاعتبار ان لو حضرتك قاعد على يمين
المنصة مش هيعجبك كلامي ؛ ولو قاعد على يسار المنصة برضو مش هيعجبك الكلام اما بقا لو كنت قاعد فى
منتصف المنصة فبرضو مش هيعجبك الكلام ولو كنت قاعد فى مدرجات الدرجة العاشرة مش
هيعجبك الكلام ؛ يعنى بكل الاحوال هتشتم
علشان كده قولت اقول الكلمتين والحق اجرى ؛
نبدأ
بقا بالناس اللى قاعدة على اليمين دول حبابينا الحلويين بتوع نصرة الشرعية ومؤيدى المعزول محمد مرسي
واللى
لسه معتصمين حتى تاريخه فى كل ميادين مصر كما
تقول قناة الجزيرة النزيهة
بالنسبه
لهولاء الحمد لله قاعدين واكلين
شاربين معتصمين فى عز الحر فى ارقي مناطق
مدينة نصر يعنى بعتقد انهم داخليا نفسهم يفضلو معتصمين كأنهم فى نزهة ؛ لان منص رابعه بخلاف الجو
الروحانى اللى هناك برضو فى فقرات ترفيهيه
واهو كله بثوابه دول بقا مش هيمشوا
الا لما مرسي يرجع ربنا يوفقكم ويدينا
ويديكم طول العمر ؛ معاهم بقا مين انصار
الشرعية واصحاب المبادىء من كل الدول العربية الشقيقة اللى بيقولو انهم هبوا لنصرة
الشرعية فى مصر وكأن سبحان الله مفيش بلد
فيها اضطهاد للشرعية الا مصر رغم ان هؤلاء
لا يعلمون شيئا عن الشأن الداخلى المصري ولا يعرفوا ازمات الشعب
ومشاكله حتى !!!!
بالرغم
من انهم من جنسيات مختلفة سورية وعراقية ويمنية وفلسطنييه واردنية وقد
يكونوا من جنسيات اخرى ويعيشون فى دول عربية شقيقة بدافع البحث عن لقمة العيش ؛
لهؤلاء اقول لهم انقد وشارك وعبر عن رأيك
كمان لان ده متوقع لان بلد مثل مصر لها وزنها وثقلها الاقليمى لكن بشروط ( كن
موضوعى لاتأجج الفتنه لا توسع دايرة الشقاق بين ابناء الوطن الواحد بنقلك لكل ما
من شأنه ان يعمل على هذا لان فى الغالب ما تقوم بنشره يكون مزيف وحقائقه مغلوطة ؛ بغرض
اثارة الرأى العام ضد مصر وهذا مرفوض تمااااااما ليه بقا هقولك ليه
احنا
كشعب مصر قادرين اننا نحل مشاكلنا مع بعض
واللى داخل بينا خارج باللغة الدارجه يعنى
يعنى
من الاخر انا واخويا وابن عمى على الغريب رجاء خليك فى حالك
واراهن
اى حد منكم انه يقدر ينقد او يتدخل فى شأن اى دوله هو ضيف فيها او لاجىء فيها
ياريت نعرف حجمنا كويس ونحمد ربنا ان مصر مستوعبة الكل ..ومحدش يقولى ده واجب
علينا كمسلمين مناصرة المظلوم فى اى مكان
؛ لانى هقولك هما الظلومين موجودين بس فى مصر ؛ أشك ...!
بكل
الاحوال نتمنى ان يكون حبكم للمعزول وللشرعية زى حبكم لمصر كده بل ربما اكثر كمان
مش زى الاخ ابو بركة لما ما رضي يختار بين علم الجماعة ومصر ؛ ليه هما خيروك بين
علم الجماعة وعلم اسرائيل مثلا
ده
انت لو ذكى واخترت علم مصر ببساطة كنت هتكتسب احترام كل المعارضين وكذبت
بأختيارك كل ما يقال حول الجماعة من كلام
الله اعلم اذا كان حقيقى او اشاعات بغرض اثارة حفيظة الناس ضد الجماعة وانصارها
!!! كلمة اخيرة لكم تأكد انك لو حكمت وعدلت كان زمانك ملك متوج على عرش قلوب
المصريين قبل ان تحاسب الشعب على كرهه لكم حاسبوا المقصرين منكم واحفظ ماء وجهك
امام نفسك والعالم ؛.
اما
لو انت من الناس اللى قاعده على يسار المنصة خد بالك النخبة وانصار المخلوع مبارك انضموا وتسللوا
للميدان وظهورهم يسىء اكثر ما يفيد لانهم بصراحة الفئة الوحيدة اللى كانت مرفهه فى
عهد المخلوع مبارك واكثر الناس تضررا بخلعه فى اعقاب ثورة يناير ياريت تختفوا بقا
شكلكم وحش وانتو عملين ثورجية بصراحة مش لايق عليكم الدور خالص ؛ سيبوا الميدان
للفقراء اللى لسه بيطالبوا بالحرية والعدالة الاجتماعية بصراحة لحد
هنا وتشكرات يا افندم كتر خيركم
اووى ؛
الناس
اللى ف النص حبيايب قلبى كنباوى وافتخر يا
مراحب بيكم على ارض الواقع اخيرا ظهرتوا
على الشاشة وحسيتوا بالميادين والمظاهرات
حمدالله على السلامة ؛ اه رأيكم فى التظاهرات والثورات حلوة وزى الفل اهو
مفيش احلى من كده الجيش بيقولك بحميك والشرطة كمان بصراحة نورتونا الايام اللى فاتت وشرفتونا
اووووووى ادام العالم كله ؛ بس سؤال رفيع بعد اذنكم ها لسه اللى فى التحرير بلطجية
زى ماكنتم بتقولو ا ولا طلعوا وطنيين ؟ يا ترى الميدان فيه ترامادول ودعارة وكل ما
لذ وطاب ولا ايه النظام ؟
اظن
شفتوا بعيونكم ان الميدان فيه فقراء لسه بيطالبوا بابسط حقوقهم من الكرامة والعيش
والحرية اللى لا مبارك وفرها ولا المجلس العسكرى اخد باله منها ولا حتى المعزول
اهتم بيها ؛ اتمنى بقا ان الرئيس القادم ياخد باله منهم اوووووى لان الناس دى هى
اللى بتحرك الشارع وهى اللى بتحشد من غير مقابل لان مطالبهم فى ايد الحكومة لا
غير ..
نيجى
بقا لحزب الكنبة اللذيذ اووى الناس دى كانت ترى فى المخلوع مبارك نموذج الرئيس
المخلص يعنى كان لامم البلد ومسيطر عليها حاكمها صوح يعنى ؛ مكنشى فارق معاهم
محسوبية ولا فساد ولا حتى اطعمة فاسده مادام الهم مش طايلنى يبقا ليه اتكلم مش
ماشية بالستر يبقا خلاص نعمة من عند ربنا .. وكله كوم وانه ماشي جوه الحيط كوووووم
تانى خالص ليه بقا لانه بعيد عن البعبع امن الدولة .
مصدر
الاستقرار فى البلد
للناس
دى مخصوص اللى بتتذمر من اللى حاصل واللى بتقول احنا بنعيش اسوأ فترات
التاريخ احب اقولكم بالعكس اللى احنا
بنعمله دلوقتى احسن ما احفادك بعد عشرين سنه يعملوه يعنى اتعب شوية واستحمل
المرحلة بكل مميزاتها وعيوبها وانتكاساتها
علشان اولادك واحفادك يرتاحوا ...
يمكن حظهم يكون افضل منا .
نيجى
بقا للناس اللى قاعدة هنا وهناك دى
دول
ناس اقتنعوا بحاجه واحده ان مصر مش ممكن يحكمها حد الا لازم يكون عسكرى ؟؟؟ ليه
بقا ؟
لانهم
جربوا المدنى المنتخب غرق وغرق البلد
وعلشان ينقذها راح باع فيها بحجة
الاستثمار استثمار ايه ده فى اصول الدوله انت فاكر انك بتبيع قيراط ولا فدان ارض
دى دولة وكيان ومن اهم البلدان على كافة
المستويات
علشان
كده هؤلاء بيشوفوا ان اى حد عسكرى هيكون مقدر قيمة تراب الوطن فمش من السهل انه
يفرط في شبر منه ؛ دول بقا هتلاقى هجوم عليهم من كل الاطراف يعنى انصار المعزول
ومواليهم هيقولولك دول عبيد البيادة
هما
طبعا هيردوا ويقولو بس البيادة اشرف من ان نكون عبيد للجماعة
هتلاقى
الثوار بيتهموهم بالتواطىء لان فى تار بينهم وبين الجيش فى الفترة الانتقالية هنا
برضو مش هيسكتوا لانهم هيقولوهم ايه المجلس العسكرى الخاين اللى سلم البلد تسليم
اهالى للاخوان والجماعة مش هو الموجود دلوقتى بيادة اصغر مجند موجود دلوقتى اشرف
مائة مرة من بيادة حد حكم فى الفترة الانتقالية ليه لان الجيش انحاز للشعب ونصرة
بعد ان باءت كل المحاولات بالفشل لدول اقولهم
والنبي يا اخواننا استنوا شوية بس نخلص على الارهاب ونحل المشاكل اللى
البلد فيها وبعدين نتحاسب ؛ انتو فاكرين ان الشعب ده بينسي لا طبعا
ده شعب جبار ؛ بس فى اولويات نوقف البلد على رجليها الاول ونضفها ونبدأ شغل
على نضافه مش كده ولا ايه ؟
انا
كده خلصت الحق اجرى بقا ..
الماتش
خلص .
أمل
زيادة
30/
7 /2013
21
رمضان
ليست هناك تعليقات:
إرسال تعليق